Abwooli Rujumba orutuutu rwo’gwo Omubiitokati muhara wa Bulemu Ashiraf amachura ga Aramanzani Mwirumubi ogu owubutakair’aga , nkumanyisa obwiire, batabalizeho ngu yaali ngonzi muno ya Ise, kandi emanzi muno, Cwa II Kabaleega abanyamirwa’be (ab’omukikaali) ahamu n’Abanyoro n’Abanyorokati boona owubakubyaga (rundi tukwete okuhaisaniza) bati: Ekituule kinobere abeemi; rumomamahanga; omuliisanfuuzi; mbogo emu, bahiigi Magana; Ikingura; kabumba; entale y’aBunyoro ahamu nebindi biingi muno ebinta’sobole kumarayo ahabwa akaanya kake akanyina,–Ik’ara mutowange mbikusoboore.
Eby’omukoro ogwo ogunyakubaire gw’ekitinisa muno kandi gwiina ekigendeerwa eky’okugaara buhyaka emiringo rundi tubweete oburomborombo obw’ediini yaitu ey’obusiraamu ahamu n’ engeso zaitu nk’abanyoro bikangwiibwa omumatu ogu nyokwenkuru Akiiki omugonzebwa Omufumambogo.
Emambya ekaba nekyasara eti pa-pa-p, obwo ensi nekyarumu obutiti ekiro kyakatanu ebirobyokweezi 9 ebyokwomwenda, 2011- abasiraamu bagyeeta Juma’a, mwenewaanyu kandi mukuruwaawe Isaaka Kugonza rw’ombule Isentoicwe enganzi muno omusomesa Kirungi Sulaiman, obu naaraba aha rukomo rw’endeetabigambo yange (mungambo yabirobinu niyo esimu) na’bindetera nk’okubyakabaire ebigambo.
Ngu, nkulengaho kumanyisa ebigambo, Isentoicwe omubazi w’ebitabu omurongo Amooti Isingoma na’manyisa okuraba omuliwe ngu halibayo omukoro, owe hali Kikwananana, og’wokutaaha enju ahamu n’okusiima Nkya- Nyamuhanga, ogu atakohya okusobozesa mukaikuruwe, kandi nanyowe owange Kahunde, kuhikya omwaka gumu omunsi enu.
Ngu abairege nanyeta?, Tindakubiihe ngu manyire. Ngu abairege n’amanyisabumanyisa? Mananukwo. Baitu egyo teriniyo engiga ekukirayo obukuru ahabwaaki nkuhandiikiire, omusambu Abwooli, omwitumbi linu. Omunyongooro nk’okugwahikire haiziba batakimanye abo boona nk’okubwabaire buzaale bwaabu okurahuka. Omunyongooro gukahika!
Nanyowe ninkusaba n’obubundaazi bwamaani muno ngu onyeikirize ngeende mpora orundi nanyowe ndihika aha ngiga endeteire kuhandiikira. Baitu okubanza kwabyoona, kambanze njune akatahyo kanu akatwekerwe, nk’omwisiki omuhara, kyokora ganu maize ebyo ebinyakukabamu- tugambirege amaizi. Eiroho libaire lyanyita…
